Nagaland Assembly-in Munipical Act 2001 an sût

Nagaland Legislative Assembly (NLA)-a member 60-te chuan Thawhlehni khan lungrual takin Nagaland Municipal Act (NMA) 2001 sut an remti a, he Act hi sut zui nghal a ni.

Urban Local Body (ULB) inthlan lo awm tur chu Muni­cipal Act, 2001 hi ennawna siamṭhat a nih phawt loh chuan mipuiten boycott an tum thu an sawi hnuah, Assembly-ah Act sutna tur resolution hi member-ten lungrual takin an pawm a ni. House chuan tribal pawl leh civil society organisation hrang hrangin UBL inthlan lo awm tur chungchanga an thil phutte chu an ngaihtuah hnuah resolution hi siam a nih thu sawiin, "He Act hi Article 371-A nena an inkalh nia mipui­ten an ngaih avangin a tir aṭangin harsatna hrang hrang a awm nghal a ni," tiin a sawi.

Kum 2012 khan House chuan Constitution-a Article IX A-a municipalities leh town council-a hmeichhiate puala seat 33% dah tura tih chu Nagaland huam tir lo turin resolution a lo pass tawh a, mahse kum 2016-ah House vek hian he resolution hi a hnawl a ni. Kum 2016 December thla khan state election commission chuan kum 2017, February 1-a ULB inthlan nei turin hriattirna a tichhuak a, mahse tribal pawl leh organisation hrang hrangten duh loin, state pumah nawrh huaihawt a ni zui a ni. Nawrh huaihawttute hian sorkar building ṭhen­khatte halin, buaina chhuak vangin nunna chan pawh an awm bawk. Hei vang hian sorkar chuan inthlan neih tur hi a ṭhulh a ni.

Kum 2022, March 9-ah tribal pawl leh organisation dangte telin State Level Consulative Meeting chuan Constitution 74 Amendment Act zulzuiin ULB inthlan hi buatsaih turin an pass a, inthlan neihna tur sorkarin a buaipui chhoh hnuah pawl hrang hrang chuan Nagaland Municipal Act (NMA) 2001 sut phawt hi an phut leh a ni. Pawl hrang hrangte thil phut hi Assembly House-ah ngaihtuah anih hnuin, House chuan he Act hi sut a nih phawt loh chuan ULB inthlan hi buatsaih a ni thei dawn lo tiin, member-ten lungrual takin sut an remti a ni.