Assamese-Bengali 'Gamosa' vangin ngaihdam dil

Bangla Sahitya Sabha of Assam (BSSA) chuan Assamese leh Bengali 'gomasa' (scarves) an ṭhuipawlh avanga sawiselna na tak an dawn hnuah ngaihdam an dil.

BSSA chuan kum khat chuang liam taah khan pawl dang pakhatin hnam pahnihte gomasa an ṭhuipawlh hi an lo hmuh avangin hetiang hian an ti ve tih an sawi. Pathiannia state level meeting an neihah khan an mi sawmte hnenah gomasa ṭhuipawlh hi an hlan a ni. An mi sawm zingah hian state education minister Ranoj Peju pawh a tel.

Mahse Assamese leh Bengali gomasa ṭhuipawlh chungchangah hian sawiselna nasa tak an tawk zui a, hei vang hian Thawhlehni khan BSSA chuan ngaihdam dilna hi an tichhuak a ni. BSSA working president Khagen Chandra Das leh general secretary Prasanta Chakraborty-te chuan thuchhuah siamin, " He thil hi Barak leh Brahmaputra valley inlungrualna leh pumkhatna lantirna angah kan ngai a ni. Mahse state chhunga mi ṭhenkhatten kan ngaihdan hi min ṭawmpui thei lo. An rilru kan tihnat vangin ngaihdam kan dil a, nakin zelah pawh hetiang thil hi a thlen nawn tawh lohna turin kan fimkhur tawh ang," tiin an sawi.

Sawiseltute chuan BSSA thiltih hi Assamese 'gamosa' hmusitnaah an ngai tih sawiin, hetianga an thiltih hian inṭhendarhna a thlen zawk dawn a ni, an ti. BSSA thiltih duh lohna lantirin Thawhṭanni khan All Assam Moran Students Union, Bir Lachit Sena, leh Jatiya Yuba Shakti-te chuan state chhunga khawpui hrang hrangah kawng an zawh a ni.