Manipur : NRC hman thuai phutin Imphal-ah nawrh huaihawt

Manipur-ah National Register of Citizens (NRC) leh population commission (PC) hman thuai phutin Imphal-ah Thawhlehni khan nawrh huaihawt a ni.

Nawrh huaihawtte hian Manipur sorkar chu NRC leh PC tikhawtlai luiah an puh.

Imphal-a nawrh huaihawt hi zirlai pawl paruk bakah hmeichhe pawl leh Coordinating Committee on Manipur Integrity (COCOMI) ten an thlawp a, Ima Keithel aṭangin Chief Minister bungalow thleng kawng an zawh.

CM chenna in an thlen dawnin kawngzawhte hi police-ten lo dangin, an innawrbuai zui a ni. Mahse buaina liantham chhuak loin pungkhawmte hi an hnawt kir a ni.

Zirlai pawl, COCOMI leh Imas-te chuan Manipur sorkar chu an state-a dan loa pemlut dang tura hma la turin an phut bawk. Nawrh huaihawtnaa tel zirlai pawlte chu - Manipur Students’ Federation, Democratic Students’ Alliance of Manipur (DESAM), Kangleipak Students’ Association, Students’ Union of Kangleipak, leh Apunba Ireipak-ki Maheiroi Singpang Lup-te an ni.