Assam Congress-in CM Himanta lakah privilege notice thehlut

Assam Congress chuan Rahul Gandhi MP nihna hlihsak a nih chungchang state assembly-a debate an neihnaah, state chief minister Himanta Biswa Sarma thusawi danah lungawi loin, a thusawi pakhat avangin a lakah complaint an thehlut.

Congress Legislature Party hian Assam Assembly-a principal secretary hnenah complaint hi an thehlut a ni. Complaint thehluh hnuah CM Sarma chuan House chhunga a thusawi chu a sut leh nghal a ni. CM-in a thusawi a sut hnuah Congress chuan privilege notice an thehlut hi an la hnukdawk duh lo a, Chief Minister chuan a thusawi sut ringawt lo a, ṭawngkam ngeia thupha chawi tura an phut thu an sawi.

Complaint an thehluhah hian, "House leader Dr Himanta Biswa Sarma chuan ACLP (Assam Congress Legislature Party) room-a an thil sawiho chungchang a hriat thu a sawi. Hei bakah ACLP-a member ṭhenkhat chuan March 28, 2023-a CLP meeting neih ṭuma an thurelte an hrilh niin a sawi," tiin, hetianga House Leader-in dawt a sawi hi an dem thu tarlangin, ACLP chuan a lakah complaint hi an thehlut tih an sawi. An lehkha thehluhah hian Congress MLA 20 chuangte chuan hming an ziak a ni. Principal secretary chu dan ang taka CM lakah action la tura an phut thu an sawi bawk.