Assam-a district 8-ah Armed Forces Special Powers Act pawtsei

Assam-a district pariat chu disturbed area-ah puan chhunzawmin, sipai hnena thuneihna sang pekna Armed Forces Special Powers Act (AFSPA) pawhsei a ni.

Assam home and political department-in hriattirna a tihchhuahah, AFSPA hi Tinsukia, Dibrugarh, Charaideo, Sivasagar, Jorhat, Golaghat, Karbi Anglong leh Dima Hasao district-ah April 1 aṭanga chhiarin, thla ruk dang pawhsei a nih thu an tarlang. Hetih lai hian Cachar district-a Lakhipur sub-division chu 'disturbed area' aṭanga paih niin, AFSPA hi tihtawp a ni thung.

Assam state-ah hian kum 1990, November 27 zan aṭang khan AFSPA hi puan a ni a, hemi hnu hian he dan hmanna hi thla ruk danah ennawn ziah a ni. Kum 2022, April aṭang khan district pakua leh Cachar district-a sub-division pakhat huam chhung tih loh, state chhung hmun dangah AFSPA hi hlih vek a lo ni tawh a ni.

Sorkar laipui chuan Nagaland leh Manipur-a AFPSA hman mek pawh a ennawn bawk a, Nagaland-ah hian district pakua leh district dang palia police station 21 huam chhungah he dan hi thla ruk hman chhunzawm turin a pawtsei. Manipur-ah pawh police station 19 huam chhung tih loh, hmun dang zawngah he dan hi hman chhunzawm a ni dawn bawk.