Meghalaya ; HC-in Greenfield airport siamna tur hmun tifel turin ngen
Meghalaya High Court chuan state sorkar hnenah Greenfield airport siamna tur hmun tifel turin a ngen.
Shillong airport chu thlawhtheihna lian zawkte ṭum theihna tura zauh a remchan loh vangin, an state tan Greenfield airport siam chu thil ṭul a nih thu court chuan a sawi.
Chief justice Sanjin Banerjee kaihhruai division bench chuan hemi chungchanga PIL thehluh chu ngaihtuahin, "State sorkar chuan Aiport Authority of India (AAI emaw), Umroi airport-a official awmte emaw berawnin, ram an ngaihven a ngai a ni. Hemi hnua AAI chu sawmin, Greenfield airport siamna atan a remchang em tihte an entir a ngai dawn a ni," a ti. Hemi rual hian sorkar laipui leh state sorkarin airport siambelh an tum lo a nih erawh chuan inrawlh an tum loh tih Meghalaya High Court chuan a sawi nghal bawk.
Shillong airport runway hi tlangin a hual avangin zauh theih a ni lo a, hei vang hian thlawhtheihna lian chi an ṭum thei lo. ATR leh thlawhtheihna te chi, Bombardies-te chauh an ṭum thei a ni. Airport lian hnaih ber chu Guwahati, Assam-a Lokpriya Gopinath Bordoloi International (LGBI) niin, Shillong aṭangin km 140 vela hla leh, darkar 3 vel tlan a ni.
Court chuan Meghalaya chu tlang ram ni mah se, airport lian siam theihna tur hmun zawl zau tak tak pawh a awm a, Ri-Bhoi emaw, West Khasi Hills-ah emaw hetiang siam theihna tur hi a awm a ni, a ti.
AAI report chuan Umroi-a Shillong airport chu thlawhtheihna lian ṭum theihna tur zauh tumna chu a remchang ber lo niin a lo sawi a, runway zauh dawn hian thingkung tam tak kih a ngaih dawn avangin a hautak dawn lutuk niin a sawi a ni.