Naga hmeichhe pawlin Municipal Act sût an thlawp lo

Naga Mothers' Association (NMA) leh Nagaland University-a English Deparmtent huaihawta hmeichhe pawl hruaitu hrang hrangten municipal inthlan chungchanga state-level discussion an neihah, Nagaland Assembly-in Nagaland Municipal Act, 2001 a sût tak chu an thlawp lo tih an sawi.

March 29-a, NU Kohima Campus-a Ladies Hall-a sawihona hun buatsaihah, NMA chuan point 3 awmna resolution pass a ni tih a tarlang. "Naga hmeichhiate chuan Municipal Act 2001 leh First Amendment-a urbal local body-ah hmeichhe puala 33% dah chu a thlawp a ni," an ti. Tribal leh organisation hrang hrangte'n Municipal Act, 2001-a hmeichhe puala an duh loh avang leh, urban local body inthlan boycott-a an vau hnua Assembly-in Act a sut chungchangah, hmeichhe aiawhte leh pawl dangte pawh inbiakna an neihpui hmasa lo tih an sawi a ni. House-a sawiho a nih laia hmeichhe MLA pahnih an neihte an ngawi reng leh, a dodal zawnga vote an thlak lo chu a lungawi thlak loh tih an sawi bawk.

Sawihona hun buatsaihah hian Nationalist Democratic Progressive Party (NDPP), Bharatiya Janata Party (BJP) leh political party danga hmeichhe aiawhte bakah, hmeichhe pawl Naga Women Hoho, Dimapur, Zeliang Mepui Organisation leh Pochury Mothers’ Association aiawhten thu an sawi a ni.

Nagaland Assembly-in Nagaland Municipal Act, 2001 a sut tak avangin state election commission (SEC) chuan May 16-a urban local bodies (ULBs) inthlan neih tura tih pawh ṭhulh a nih thu a puang zui ve bawk. State election commissioner, T Mhabemo Yanthan chuan March 9-a Municipal Council 3 leh Town Council 36-ah inthlan neih hun tura thuchhuah siam chu, order dang a awm leh hma chuan sut a ni tih a sawi.