Tripura eptuten BJP MLA chunga action lak phut

Tripura Assembly House-a leader of opposition, Animesh Debbarma chuan assembly session neih zawh takah House chhunga rorel laia video ṭha lo entu, BJP MLA Jabad Lal Debnath chungah hremna na tak pek a phut.

Animesh Debbarma chuan BJP MLA chungah hian action la ngei turin BJP Legislature Party leh Assembly Speaker chu a phut tih a sawi. "Hetianga video hi a mimal hmunah a en duh a nih chuan kan sawisel lo a, kan thuneihna pawh a ni lo. Mahse mipui aiawh roreltu atana thlante tan state assembly chu kan hmun pawimawh, kan hmun serh a ni a, hetianga mawi lo taka lo awm hi eng kawng mahin kan enliam mai tur a ni lo. State assembly member-ah dah zui zel tlak a ni lo," a ti.

Dabbarma chuan, "Hetiang bawka House chhunga video ṭha lo tak lo entu, BJP MLA Laxman Savadi chuan ngaihdam a dil hnuah Karnataka deputy chief minister-ah hlankai a ni a, hetiang thil ang bawk hi Gujarat-ah pawh a thleng tawh. Hetih lai hian Rahul Gandhi chu a campaign laia a thusawi chungchang avangin disqualify a ni thung a, engvangin nge assembly chhunga mawi lo taka thiltitu BJP MLA hi hrem a ni ve loh ang? Chief minister Dr Manik Saha chauh ni lo, prime minister Narendra Modi thlengin an hming a tichhe tel a ni," tiin a sawi.

House chhunga video ṭha lo entu, BJP MLA ṭhutna chair chu then thianghlim a ngai a ni tiin, 'A chair hi Ganga lui tuia silfai kan phut a, assembly session-a a tel ve khap nghal kan phut bawk a ni," a ti. BJP MLA hi hremna pek a nih loh chuan, state chhunga hnam leh pawl hrang hrangte chuan a chetdan mawi lo tak duh lohna lantirna buatsaih ngei an tum tih a sawi bawk.