Assam-AP ramri buaina 92% chinfel a ni tawh

Assam chief minister Himanta Biswa Sarma chuan Assam leh Arunachal Pradesh-ten ramri buaina an neih zinga 92% chu chinfel a ni tawh niin, Arunachal Pradesh chief minister Pema Khandu nen meeting an neih hnuah a sawi.

Guwahati-a Zirtawpni liam taa chanchinthar lakhawmtute a kawmnaah, CM Sarma chuan Assam leh Arunachal Pradesh chief minister-ten meeting an neihah, ramri chungchanga buaina an neihna zinga 92% chu an chingfel tawh a ni, a ti. "Assam-Arunachal Pradesh ramri buaina chu chinfel kim a ni hnai tawh. Jonai MLA leh an thawhpuite chuan ramri hrula thingtlang khaw 10 an tlawh leh dawn a, hemi zawhah hian buaina awmte hi chinfel vek a ni tawh ang," a ti. Chief Minister pahnihte hian kar liam ta Ningani khan Guwahati-ah meeting neiin, ramri chungchang hi an sawidun a ni.

CM Sarma chuan state pahnihte chuan April thla laihawl hian sorkar laipuiah inremna an siam, memorandum of understanding chu an thawn ang a, sorkar laipui kutah a awm tawh dawn a ni, tiin a sawi zui bawk. "Kan buaina chingfeltute hi tualchhung aiawhte, MLA leh mitinte kan ni. Buaina la awmna, thingtlang khaw 10 huam chin chungchang hi ngaihtuah leh niin, state pahnihah MLA-te pawh biak an nei dawn a, April 10-ah report hi thehluh hman tum a ni," tiin a sawi.

Arunachal Pradesh chief minister Pema Khandu pawhin, state pahnihten hun rei tak ramri chungchanga buaina an lo neih tawhte chu Assam CM Sarma nen chinfel ngei an tum thu sawiin, hma an sawn zel avang pawhin a lawm thu a sawi bawk. Buaina chinfel a nih theihna atan state pahniha Regional Committee-te an thawk rim hle a, harsatna awmte pawh sawihoin, hma lak zel dan turah pawh rawtnate an siam ṭhin a ni, a ti.

State pahnihten ramri chungchang buaipui tura regional committee an dinte hian inbiakna pawh an lo nei fo tawh a ni. Nikuma Assam CM Sarma leh AP CM Khandu-ten Namsai Declaration a an regional committee-te hian a huhohin border area hi an lo tlawh tawh bawk a ni.