Manipur : Myanmar detention centre atan barrack hlui hmang dawn

Manipur-a Chura­chandpur district-a Singha sub-division huam chhunga police barrack hluite chu Myanmarese detention centre atan an hmang dawn.

State sorkarin Myanmar raltlante buaipui tura cabinet sub-committee a dina an chairman, tribal affairs minister Lepao Haokip chuan barrack hlui detention centre atan hman a nih thu sawiin, sub-committee member-te pawhin barrack hlui hi tlawhin an enfiah thu a sawi. Cabinet sub-committee-ah hian law minsiter Thounaojam Basantakumar leh water resources minister Awangbow Newmain-te chu member an ni.

Myanmar rama sipai sorkar a din hnuah, sipai leh sipai sorkar dodaltute inkara buaina a chhuah fo avang te, sipaiten helpawl camp-te an beih ṭhin avang tein Myanmar mi tam tak chu Manipur-ah hian an tlanchhia a ni. Manipur sorkar chuan Myanmar raltlante chungchanga lo buaipui a, an awm lailawkna turte ngaihtuah turin sub-committee hi a din a ni. Sub-committee hian police barrack hlui, hluihlawn tawhte chuan ratlante awmna tur hian hman an ni dawn tih an sawi.

Singhat police station hnuaiah hian detention centre-a hman tur, barrack hluihlawn hi pali a awm. Barrack type quarters-ah hian mi 50 vel an awm thei ang.

Minister Haokip chuan, an rama Myanmar ramtlante chu sorkarin awmna tur leh ei turte a ngaihtuahsak a, Myanmar ram boruak a ṭhat leh veleh an ram lamah an kir leh dawn tih a sawi.