Assam-ah ram nei lo chhungkaw nuai 5.80 awm

Assam revenue and disaster management minister Jogen Mohan chuan an state-a ram nei lo, chhungkaw nuai 5.80 chuang an awm thu a sawi.

State legislative assembly session-ah Minister Mohan chuan ram nei lo awm zat hi a sawi a, hemi rual hian state sorkar chuan chhungkaw nuai 1.35 hnenah patta a pek tawh thu a sawi nghal bawk. Dan loa sorkar rama awmte chhuah tir tura hma lak chhoh zel a nih thu leh, ram nei lote tana Land Policy of 2019 hnuaiah a tahtawla ram pek mek a nih thute a sawi a ni.

Sorkar rama chengte chhuahtir a, eviction drive neih ṭhin chu Assam Land and Revenue Regulation, 1886 hmanga kalpui ṭhin a nih thu Minister chuan a sawi. Eviction drive neihnaah sakhaw thliarna awm ṭhin nia sawi chu thu dik lo a nih thu a sawi nghal bawk.

State assembly-ah hian a hmain state chhung hmun hrang hrangah sorkar ram, sq km 5,404-a zau chu dan loa luah niin, mi nuai 8.57 vel heng hmunah hian an khawsa mek nia sawi a ni lo ni tawh a ni.