Assam : Eptuten Guwahati flyover contract pek dan chhui chian phût

Assam-a eptu party-te chuan Guwahati flyover siamnaa contract pek danah thil dik tawk lo a awm tih sawiin, chhui chian an phût tih an sawi.

Congress, Raijor Dal leh Assam Jatiya Parishad (AJP) chuan Super Market flyover contract pek a nih dan chu high-level investigation tih an phût thu sawiin, kum 2021 November 4 khan chief minister Himanta Biswa Sarma chuan he flyover hi hawngin, media report aṭangin a hawnna inkhawm neihna ringawtah hian Rs nuai 45 chuang sen a ni, an ti. Congress party thupuangtu, Manjit Mahanta chuan, "Flyover hawn a nih aṭanga thla nga dawn hnuah a hawnna tur programme atana tender hi tihchhuah chauh niin, thla sarih hnuah contractor hnenah work order pek a ni chauh bawk," tiin a sawi.

Flyover contract hmutu firm hi CM Sarma chhungkua nena inzawmna nei firm a nih thu Congress thupuangtu chuan a sawi.

Raijor Dal vice president Rasel Hussain chuan contract pek dan dik tawk lo hi Enforcement Directorate (ED) in an chhui a phut thu sawiin, "PWD hi Chief Minister enkawl a ni. Mi tumahin CM hi an kawh a, an mawhpuh bik kan duh a ni lo. Mahse hetianga a department leh a chhungte inhnamhnawihna nia sawi chungchang hi chhui chian kan phut a ni," a ti.

AJP thupuangtu Ziaur Rahman chuan hna thawh zawh vek a nih hnuah tender tihchhuah a ni chauh chu mak a tih thu sawiin, high court judge ṭanglai kaihhruaina hnuaiah thil awm dan dik tak haichhuah a nih ngei an phût tih a sawi ve bawk.