Covid-19 hri leng thawh lina thleng palh thei lakah Nagaland inbuatsaih

India ram chhungah Covid-19 hri kai an pung thar leh a, hei vang hian state ṭhenkhat pawhin hri darh tur venna atana hma lak dan turte an ngaihtuah chho leh ṭan mek.

Nagaland sorkar pawhin hri leng thar leh mek karah state mipuite chu chiai lo tura chahin, hri leng thawh lina lo thleng palh theih lakah state sorkar chu a inbuatsaih ṭha tawk hle tih a sawi.

State health commissioner leh secretary, Y Kikheto Sema chuan press conference neiin, state sorkar chu infrastructure ṭha zawk nena a inbuatsaih thu leh, thawktu mihring pawh an ngah tawk thu a sawi. "Kar li liam ta chhung khan ram chhungah Covid-19 hri kai hi an pung chho leh hle a, mahse Nagaland-ah bik erawh chuan hri kai hi an awm thar lo a ni," a ti. Hri kai tam chhohna state dangte pawh an bepawp reng tih a sawi bawk.

Sema chuan, hri leng leng thar chu hri leng thawh khatna leh thawh hnihna anga a nat tawh loh avangin hlauhthawn leh chiaina tur a awm lo tih a sawi. Hri leng thawh khatnaah khan state sorkar chu a lo inbuatsaih ṭha hman lo tih a sawi a, mahse tunah chuan health infrastructure-te chu thuam ṭhat leh tihchangtlun chhoh vek an ni tawh a ni, a ti. 'Eng pawh hmachhawn thei turin kan inbuatsaih ṭha tawk a ni," tiin a sawi. April 10 leh 11 hian inbuatsaihna atan mock drill an buatsaih dawn bawk a ni.

Nagaland-a Covid-19 hri kai hmuh hnuhnun ber chu February 11-ah khan a ni.