Meghalaya winter capital atan Tura puang turin phut

Meghalaya-a Garo Hills-a NGO, A'chik Conscious Holistically Integrated Krima (ACHIK) chief minister Conrad K Sangma hnenah petition thehlutin, West Garol Hills headquarters, Tura khawpui chu Meghalaya winter capital-a puang turin an phut.

Chief Minister hnena lehkha an thehluhah, Tura chu state winter capital-a puan a nih chuan thuneihna semrualin, hmasawnna pawh a kalrual thei dawn a, Meghalaya state pum mipuite chawikanna kawngah pawh a ṭangkai dawn tih an sawi. ACHIK hian Tura-a Additional Secretariat sawn an phut bawk.

India ram state dang, khawpui pakhat aia tam neihte pawh tarlangin, Andhra Pradesh-in pathum, Himachal Pradesh-in pahnih, Jammu and Kashmir-in pahnih, Karnataka-in pahnih leh Maharashtra state pawhin pahnih an nei tih an sawi. "Heng state-te hian an state chhung hnam hrang hrangte tan inrelbawlna ṭha leh rintlak tak an siam a ni. Dik tak leh rualkhai taka hmasawnna hna kalpuina turin, Tura chu Meghalaya state winter capital-ah siam a ni tur a ni," tiin an sawi.

All Garo Hills Merchant Association (AGHMA) pawhin 'second capital' atana Tura siam chu thil tih ngei ngai, an state dintu an pi leh pute pawhin an lo thlir lawk dan a ni tih an sawi. AGHMA president, Thoseng Chiba Mark chuan, second capital neih chu an bial tan hmasawnna chauh ni lo, business sector lam thlengin an hlawkpui a, state economy thlenga ṭhatpui theihna tur a ni tih a sawi ve bawk. State sorkarte chuan Garo Hills chu an ngaihthah zel a, mipuiten ngenna an siam ṭhinte pawh an bengkhawn sak ngai lo a ni, a ti.