Jiribam-Imphal rel kawng siam hna 93% zo tawh

Jiribam-Imphal rel kawng siam hna thawh mek chu zawhfel a ni hnai tawh a, hna hi 93.30% zawh a ni tawh.

Km 110-a thui rel kawngah hian tunnel leh bridge 52 a awm a, tunnel thui ber chu km 10.275 a ni. Tunnel awm ho hi a vaiin km 61.32-a thui an ni a, heng zinga km 59.11 chu thawh zawh an ni tawh. Hei bakah major bridge panga leh minor bridge 101 pawh siam zawh a ni tawh bawk.

Northeast Frontier Railway official chuan rel kawng siam hna hi ngawrh taka thawkin, hma pawh an sawn chak hle tih a sawi. He rel kawng hi Manipur khawpui, Imphal a pawh dawn a ni. Jiribam-Khongsang section-ah chuan rel tlantir a ni tawh bawk. He project hi zawh fel a nih hunah chuan Jiribam-Imphal inkar, motor-a darkar 10 vel tlan ngai ṭhin chu rel hmang hian darkar 2 leh a chanve velah a thlen theih tawh dawn a ni.