Sikkim-ah vur tawlhin 7 a chhilh hlum

Sikkim state-ah Thawhlehni khan vur tawlh/min in a chhilh khualzin pasarih an thi. Thite hi Nepal mi pathum, Uttar Pradesh leh West Bengal state mi pahnih ve ve an ni. Mi dang 13-te chu him taka chhanchhuah an ni.

Thawhlehni chawhma dar 11:30 vel khan China border bul, Nathu La area-ah vur nasa takin a tawlh a, motor t-6 leh khualzin 30 vel a chhilh a ni. Vurin a chhilhte chhanchhuah hna hi sipaiten rang takin an thawk nghal a, mahse an zinga pasarih erawh an lo thi hman a ni. Nungdama an chhanchhuahte chu sipai damdawi-in leh state hospital-ahte hruai nghal an ni.

Chief minister Prem Singh Tamang chuan mi 13-te chu Gangtok-a STNM Hospital-ah hruai an ni a, an dinhmunte enfiah a nih hnuah mi pakuate chhuahtir an ni tih a sawi. Hliam tuarte in enkawlna hi Sikkim sorkar chuan a tumsak vek dawn tih a sawi.

Chhanchhuah hna thawh laiin, tlai lam dar 5:35 ah vur hi a tawlh leh a, hei vang hian hna thawh pawh tihtawp lailawk a ni.

Gangtok district collector Tushar Nikhare chuan vurin a chhilh hlum, India mi pali chhungte chu zangnadawmna pek an ni dawn tih a sawi Nepal mi thi chhungte hnenah zangnadawmna pek a ni dawn leh dawn loh chu home department lamin a ngaihtuah tur thu a sawi.

Police-te chuan vanduaina tawk ta, khualzinte hi khua a chhiat leh vur a tlak nasat avangin Milestone 13 piah lam kal phalna pawh pek an ni lo tih a sawi. Mahse tour operator leh an motor driver-te chu phalna an neih piah lamah kal tur hian an nawr lui a, vanduaina hi an tawk ta niin an sawi. SP Tenzing Loden pawhin khualzinte hian vur tlak nasatna hmun hi pan loin dawhthei takin lo nghak ni se, chhiatna an tawh hi pumpelh theih a ni tur a ni, a ti. SP chuan chhiatna thleng tur chu sawilawk theih a ni lo a, hei vang hian khualzin kalte chu kaihhruaina dante zawm ṭha turin a ngen nghal a, Indian Meteorological Department lamin khaw awmdan chu kalchhuahna atan a him tawk nia a sawi hnuah chauh tourist spot-ah khaulzinte kal hi an phalsak chauh ṭhin tih a sawi bawk.