Shillong-a Police Bazar area no-honking zone-ah siam tum

Meghalaya-a tourism minister Paul Lyngdoh chuan an state khawpui, Shillong-a Khyndailad (Police Bazar) area chu pedestrian/walker zone leh no-honking zone-ah siam tum a ni tih a sawi. Minister hian Thawhlehni khan Police Bazar hi a endik nghal a ni.

Minister chuan horn tihrik vak vakte chu thil ṭul lo tak, a bikin hospital bul hnaia tihrik phei chu midang tana harsatna siam thei a ni tih sawiin, tihreh a ngai tih a sawi. Hei bakah hian Shillong khawpui chu kea kalte tan pawh kal vel hrehawm khawp a ni tawh tih a sawi bawk. Hei vang hian mipuite, a bikin kea kalte himna turin pedestrian/walker zone-a siam chu hmalakna tur pawimawh tak a ni, a ti.

Police Bazar no-honking zone-a siam tumna chu thil harsa tak tur a nih thu a sawi rualin, Lyngdoh chuan tih tak zeta hma an lak chuan eng thil pawh tih theih a nih thu a sawi bawk. An thil tih tumah pawh hian buaipui tur a tam chho hle dawn a, mahse mellung pawimawh tak siam ngei an tum tih a sawi.