Assam BJP MLA-in Taj Mahal ṭhiat a, temple sa zawk turin PM a ngen

Assam-a Bharatiya Janata Party (BJP) MLA Rupjyoti Kurmi chuan prime minister Narendra Modi hnenah Taj Mahal leh Qutub Minar-te ṭhiat a, an awmna hmunah temple sa zawk turin a ngen.

Tun hnaia National Council of Educational Research and Training (NCERT) in zirlaibu aṭanga Mughal lalte chanchin ziahna chapter a paih hnuah, Assam BJP MLA hian Mughal-te chu rawn runtu an nih avangin, zirlaiten an chanchin an zir a ngai lo tiin a rawn sawi zui ve leh a ni. Mughal empire chapter paih chungchangin sawisel a tawh mek laiin, BJP MLA chuan he chapter paih a nih avang hian sorkar laipui chu fakin, a hmaa lo paih tawh tur zawk a ni, a ti. Hemi rual hian Mughal lalte kutchhuak in ropui tak hi ṭhiah a duh thu a sawi bawk.

Kurmi chuan, "Prime minister Narendra Modi chu Taj Mahal leh Qutub Minar ṭhiat a, heng hmunah hian khawvela temple mawi ber sa zawk turin ka ngen a ni," a ti. Temple sak a nih chuan a kum khat hlawh pawh a thawh phal thu a sawi bawk.