AP nen ramri buaina kumin kum tawpah chinfel hman beisei a ni : Assam Minister

Assam border protection and development minister Atul Bora chuan Arunachal Pradesh nena hun rei tak ramri chungchanga buaina an lo neih tawh chu kumin kumtawpah chinfel hman beisei a ni tih a sawi.

Minister chuan Arunachal Pradesh bakah, an ṭhenawm state dangte nena ramri buaina an neihte pawh chinfel tumin hma lak zel a nih thu leh hma pawh an sawn chhoh zel thu a sawi bawk. Ramri buaina an neih chhan chu Assam aṭanga state dang din a nih laia central lama sorkarin ramri chungchang an tihfel tawk loh vang a ni, tiin he thilah hian state leh central-a Congress sorkar a dem thu a sawi bawk.

Arunachal Pradesh nena ramri buaina an neihte chinfel dan ngaihtuah turin state pahnihte'n regional committee 12 an din thu leh, anni pawh hian buaina an neihna hmunte pawh tlawh tawhin, report an buatsaih mek tih Bora chuan a sawi bawk. "Regional committee-ten report an thehluh hunah, buaina chinfelna tura rawtna an siam hmangin state pahnihte chuan inremna an siam dawn a ni," a ti.

Megahalaya state nena ramri buaina an neihna hmun 12 zinga hmun parukah inremna, memorandum of unerstanding (MoU) ziah a ni tawh a, a bak paruk pawh a chinfel dan ngaihtuahin regional committee ten hma an la mek a, mahse Meghalaya assembly inthlan neih vangin tihkhawtlai a ni rih tih a sawi bawk.

Mizoram nena an buaina neihah, Mizoram lamin an ram chin nia an chhalna document pawh an pe tawh a, hei hi Assam sorkar chuan a zirchiang mek a ni, a ti.

Nagaland nena ramri buaina an neih chu Supreme Court-ah ngaihtuah a ni a, Assam lam aṭangin witness testimonial lak chu tihfel a ni hnai tawh a, hemi zawh hian Nagaland lamah lak a ni ve leh dawn tih a sawi. State pahnih chief minister-te pawhin an sawidun tawh thu a sawi bawk.

Assam-in a ṭhenawm state hrang hrangte nena ramri buaina a neih chungchangah Congress chu mawhphurtu a ni tiin Minister chuan a sawi. "Heng state-te hi Assam aṭanga indang vek an ni. State hran siam a nih lai hian central leh Assam-ah Congress an sorkar a ni. State din tharte ramri chungchang an tifel tawk lo a, a tirah uluk takin lo tifel sela, tuna buaina hi engmah a awm lo ang," a ti. Ramri chungchang chu fimkhur leh uluk taka ngaihtuah ngai a ni tiin, misual ṭhenkhatin buaina siamna remchangahte an hmang ṭhin bawk tih a sawi. Hei vang hian state dang nena ramri kaihhnawih thilah chuan fimkhur taka thil ti turin chief minister pawhin a chah thu a sawi bawk a ni.