President Murmu-in Assam a thleng

President Droupadi Murmu chu ni thum cham turin nimin khan Assam a thleng. A cham chhung hian programme hrang hrang a hmanpui dawn a, Gauhati High Court-in Platinum Jubilee an lamna pawh a hmanpui nghal ang.

President Murmu hi state governor Gulab Chand Kataria, chief minister Himanta Biswa Sarma leh cabinet minister-ten Golaghat district-a General Field Helipad, Bokakhat-ah an lo dawngsawng a ni. President hian Kaziranga National Park a pan nghal a, Ningani zan kha a riak nghal bawk. Park western range, Bagori-ah jeep safari a nei a, zanah Kohora-a Central range-a cultural programme buatsaihah a tel bawk a ni.

Nimin zing khan President hian Kaziranga National Park-a ni hnih awh tur, 'Gaj Utsav-2023' (elephant festival) chu a hawng a, hemi hnu hian Guwahati lam a pan a ni. Guwahati-ah hian Mt Kanchenjunga-a expedition neih tur a vai liam a, tlai lamah Gauhati High Court jubilee lawmna a hmanpui leh bawk.

Murmu hian vawiin hian Tezpur a pan dawn a, Air Force station-ah Sukhoi 30 MKI fighter aircraft a chuang dawn a, tlai lamah Delhi lamah a kir ang.