CAA kan do zel dawn : AJYCP

Aom Jatiyatabadi Yuva Chatra Parishad (AJYCP) chuan Guwa­hati-a press meet an neihah, Citizenship (Amendment) Act (CAA) chu an do chhunzawm zel dawn tih an sawi. 

Press meet-ah hian zirlai pawl hruaitu, president Rana Pratap Baruah leh general secretary Palash Changmai bakah hruaitu dang eng emaw zat an tel. Changmai chuan, "CAA hi kan do chhunzawm zel dawn a ni," tiin Assam-ah ramdang mite hnena khua leh tui pek tumtu chief minister an la awm ngai lo tih a sawi nghal bawk. Tuna an chief minister nilai Sarbananda Sonowal chuan thuneihna a duh luat vangin state mipuite a phatsan ta a ni tiin, CM atana thlangtu Assam mipuiten a laka duhsakna leh hmangaihna an lantir chu a hrethiam ngai lo a ni, a ti. 

CM Sonowal-a'n tihsual a nei em tih zawhna a siam chu chhangin, AJYCP general secretary chuan, "CM hnenah ama tihsual ni loin, Assam mipuiten CM atan an lo thlang che hi an lo tisual zawk a ni tih kan hrilh duh a ni," a ti bawk. 

Zirlai pawlin CAA duh lohna lantira hma an lak tum dan hrang hrang a sawi lang bawk. Vawiin hian Assam state pumah torch rally an huaihawt dawn a, January 8-ah nawrh huaihawt a ni ang a, January 11-ah state pumah flag dum an zar bawk ang. January 12 hian martar-te zahna hlanna hun hman a ni dawn a, January 13-ah Dimapur-ah sit-in demonstration an huaihawt dawn bawk a ni. 

AASU-in CAA duh lohna lantira nawrh an huaihawt chu an thlawp tlat tih sawiin, Changmai chuan January 10-a prime minister Narendra Modi-a'n Khelo India Youth Games hawng tura Guwahati a tlawh hunah AASU nen inthurualin nawrh huaihawt an tum tih a sawi bawk. AJTCP hian January 5 hian Supreme Court-ah CAA khinna thehluh an tum bawk a ni. Assam-ah hian pawl hrang hrangten CAA dodalna hi an la lantir chhunzawm reng a, hetihlai hian state sorkar chuan oil and gas sector hnuaia thawkte chu Decem­ber 31, 2019 aṭangin Essential Ser­vices Maintenance (Assam) Act, 1980 hnuaiah thla ruk chhung nawrh huaihawt a khap. Sorkar thuchhuah chuan he thil hi mipuite dinhmun ngaihtuah vanga tih a nih thu sawiin, he khapna hian oil field leh refinery, petroleum siam leh supply-na bakah natural gas pawh a huam vek thu a sawi.