Amit Shah-a'n Arunachal Pradesh a tlawh dawn

Union home minister Amit Shah chuan ni hnih cham turin vawiin hian Arunachal Pradesh-ah a zin dawn. A cham chhung hian India-China border bul, Kibithoo khuaah 'Vibrant Villages Programme' a hawng ang.

Prime minister Narendra Modi kaihhruaina hnuaiah, sorkar laipui chuan 'Vibrant Villages Programme' (VVP) kalpuina turin Rs vbc 4,800 a lo pawm tawh a ni. Heng zinga Rs vbc 2,500 chu financial year 2022-23 leh 2025-26 inkara kawngpui siamna tur bik atan pawm a ni tih home ministry thuchhuah chuan a tarlang.

VVP hi centrally sponsored scheme niin, he scheme hnuaiah hian Aruanchal Pradesh, Sikkim, Uttarakhand leh Himachal Pradesh state bakah Ladakh union territory-a district 19-a block 46 huam chhung thingtlang khaw 2,967 ah hmasawnna hna thawh a ni ang. A thawh khatnaah hian khaw 662-ah hna thawh a ni ang. He scheme hian hmarlam ramri hrula chengte khawsak phung chawikanna tur te, heng khua aṭanga hmun dang pemchhuak ṭhinte an lo tlakhniam theihna tura an khuaa awm zui duhna tura hmalak ngai te, ramri security ṭha siamna turtein thawh a ni dawn a ni.

Amit Shah hian union home minister a nih hnuah Sikkim a tlawhna hmasa ber tur a ni a, vawiin hian state sorkarin Kibithoo-a 'Golden Jubilee Border Illumination Programme' hnuaia micro hydel project pakua a siam chu a hawng nghal ang. Hei bakah hian Indo-Tibetan Border Police (ITBP) project-te a hawng dawn bawk a ni. Hemi hnu hian border district-a women self-help group-te an thilsiam an phochhuahna, exhibition stall a tlawh bawk ang.

Shah hian naktukah Namti field tlawhin, Walong war memorial-ah ram tana nunna hlantute zahna a hlan dawn a ni.