Nagaland-a Burma Camp-a kangmei chhuakah mi 1 a thi; Mi 900 chuangin an chenna in an chan

Nagaland, Dimapur district-a Burma Camp-ah Pathianni khan kangmei nasa tak a chhuak a, mi pakhat a thi a, mi 900 chuang chu chenna nei loin an awm bawk.

Official-te chuan Burma Camp-a East Block-ah chhun dar 12 vel khan kangmei hi a chhuak niin an sawi. He camp-a chenna in 260 vel chu a kangral a ni.

Kangmei chhuaka kanghlum hi hmeichhia, kum 70 mi vel a ni a, mi dang eng emaw zatin hliam an tuar bawk. Gas cylinder-te a puak nasa a, hliam zingah hian kangṭhelhtu zinga mite pawh an tel. Kangmei chhuah chhan hi hriatchian a la ni lo.

Burma Camp-a kangmei chhuak ṭhelh tur hian Chumukedima, Dimapur leh Central fire station aṭangin kangṭhelhtute tirh an ni a, darkar thum chuang hnuah an ṭhelh mit thei a ni.

DPRO Dimapur chuan kangmeiin bungrua a kan chhiat hlut zawng hi cheng vaibelchhe khat chuang hu a tling tih a sawi. District disaster management authority, Dimapur chuan Dimapur DC kaihhruaina hnuaiah kangmei tuarte hnenah hian chhawmdawlna an sem nghal bawk. Pawl hrang hrangin ṭanpuina an pe bawk.

Kum 2011 khan helai hmunah vek hian kangmei nasa tak a lo chhuak tawh bawk a, mi pathum an thi. Hemi ṭum hian in 984 kangralin, mi 3,000 chuang chenna nei loin an lo awm phah tawh bawk a ni.

Pathianni khan Dimapur-a thlanmual hluiah kangmei a chhuak bawk a, thlanmual bulte a kang a, mahse reiloteah an ṭhelhmit leh thei a ni. Fire official chuan kangmei chhuah chhan tak hi hriatchian ni lo mah se, Easter Sunday puala thlana bati chhit aṭanga chhuak a nih maitheih thu a sawi.