CDS Anil Chauhan-a'n Sikkim-a forward area a tlawh

China nena ramri boruak inepna awm mek karah, chief of defence staff (CDS) general Anil Chauhan chuan Sikkim-a forward area-te a tlawh.

CDS general Anil Chauhan hian forward area-a infrastructure dihmunte enfiahin, hna thawh dante a enpui a ni. India-China border enkawltu official-te pawh kawmin, training ngai pawimawh leh fimkhur taka awm reng turin a chah.

Tun hnaiah Bhutan chuan China nena an ramrite siamṭha turin an inpeih tih thuchhuah an lo siam a, Bhutan thuchhuah avang hian India chuan Doklam plateau chungchangah hlauhthawnna a nei a ni. Bhutan hian China hnenah Doklam plateau hi a hlan chuan, China siapite hian he hmun aṭang hian Bengal-a Siliguri corridor chu chiang takin an thlithlai thei reng dawn a ni. Siliguri corridor, chicken neck tih bawk hi mainland India leh hmarchhak state pariatte inpawhna hmun pawimawh tak a ni.