AP-a PTC-in ‘Best Training Institute’ award dawng

11th April, 2023

Arunachal Pradesh-a police training centre (PTC)-Banderdewa chuan kum 2021-22 chhung atana “Union Home Minister’s Trophy for Best Training Institution” award a dawng.

Award hi Northeast region-a zonal category-a Non-Gazetted Officers Training Institute group hnuaiah a dawng a ni.

Ministry of home affairs (MHA) chuan PTC-Banderdewa in award a dawn thu hi a puang a, Arunachal Pradesh chief minister Pema Khandu chuan PTC-Banderdewa chu lawmpuina a hlan nghal bawk.

Bureau of Police Research & Development (BPR&D), New Delhi-in training centre hrang hrangte a hmun ngeia kala an endik hnuah, award dawng tur hi an thlang a ni.

PTC-Banderdewa hi kum 1973-a din a ni. State khawpui Itanagar aṭanga km 30-a hla, NH-52 bulah a awm a, centre awmna ram hi acre 173.63 vela zau a ni.