China-in AP-a Amit Shah zin a sawisel

Union home minister Amit Shah chu ni hnih cham turin Thawhṭanni khan Arunachal Pradesh state-ah a zin a, AP-a a zin hi China chuan a sawisel zui nghal.

China hian Arunachal Pradesh hi a ram chin niin a chhal reng a, hei vang hian India sorkar laipui lama hotuten Arunachal Pradesh an tlawh hi a ngaimawhin, a sawisel fo a ni.

China foreign ministry thupuangtu Wang Webing chuan, "Zangnan (China-in Arunachal Pradesh a sawina) hi China ram chhung a ni. He hmuna Indian official-te kal ṭhin hi China-in a ram chhunga thuneihna a neih bawhchhiatsakna a ni a, hei hian ramri bula boruak ṭha leh muanawm awmna tur a tichhe thei. Hetianga an tlawh ṭhin hi kan dodal tlat a ni," tiin a sawi.

Kar liam ta khan China hian Arunachal Pradesh-a hmun 11 hming a phuah ṭhatte list a lo tichhuak tawh bawk a, hei hi India sorkar chuan a pawm lo tih a sawi zui nghal a ni.

Amit Shah hian Thawhṭanni khan Arunachal Pradesh hi thlengin, border village Kibithoo-ah Vibrant Villages programme a hawng nghal a ni. Shah chuan border area tihhmasawnna chu prime minister Narendra Modi kaihhruai sorkarin a dah pawimawh hle tih sawiin, India ram chin inches khat pawh ram dangin an luah an remti lo tih a sawi. "A duh duhin kan ram an rawn luah hun kha a liam tawh, tunah chuan inches khat pawh luah kan remti lo," a ti.

Kibithoo hi India-China border bul maia awm niin, sea level aṭanga km 9,000 sanga awm a ni. India ram khawchhak kila awm niin, AP gateway tia sawi a ni ṭhin. Hetih lai hian he khuaah hian electricity, healthcare facility a ṭhat loh bakah, kawngpui pawh an la nei ṭha lo hle.

Vibrant Villages programme hnuaiah hian sorkar laipui chuan border area-a thingltang khaw hrang hranga hmasawnna hna thawhna turin sorkar laipui chuan financial year 2022-23 aṭanga 2025-26 chhung atan Rs vbc 2,500 a pawm a. He programme hnuaia hmasawnna hna thawhna tur hian thingtlang khua 2,967 thlanchhuah an ni.