Assam-Meghalaya MoU chungchanga petition thehluh Supreme Court-in July-ah a ngaihtuah dawn

Assam leh Meghalaya sorkarin ramri buaina an neih zinga hmun ṭhenkhata inremna, memorandum of understanding (MoU) an ziah Meghalaya High Court-in a 'stay' sak avanga Supreme Court-a petition thehluh chu July thla hian ngaihtuah a ni dawn.

Chief justice of India DY Chandrachu leh justice pahnih - PS Narasimha leh JB Pardiwala awmna bench chuan, Thawhṭanni khan petition hi July thlaa ngaihtuah turin an dah a ni.

Meghalaya High Court chuan nikum December 8 khan Assam-Meghalaya sorkarin ramri buaina an neihna, hmun 12 zinga hmun parukah inremna nikum March 29-a an ziah chu hmang rih lo tura tiin a stay sak a ni.

High Court thupek siam chungchang hi Meghalaya sorkar chuan Supreme Court-ah hian a khing zui ve leh a ni.

Court-ah petition a thehluhah, Meghalaya sorkar chuan state pahnihte MoU an ziah hi dik leh langtlang taka kalpui a nih thu a sawi. Inremna an siamah hian ramri buaina an neihna hmunte hi insemin, Assam lamin square km 18.51 a chang a, Meghalaya lamin square km 18.28 a chang ve thung. Mahse heng hmuna cheng ṭhenkhat chuan MoU ziah hian Constitution-a Sixth Schedule, hmarchhak state-a ‘Administration of Tribal Areas’ kaihhnawih thil chu a palzut niin an sawi a, High Court-ah petition thehlutin court hian MoU hi a stay sak ta a ni.