Assam sorkar sawisel vangin AAP hruaitu man

Aam Aadmi Party (AAP) Assam unit thupuangtu, Susanta Kumar Nath chu April 14-a Guwahati-a Bihu festival hman dan tur chungchangah Assam sorkar a sawisel avangin Thawhlehni khan police-te'n an man.

AAP thupuangtu hian social media-ah Himanta Biswa Sarma kaihhruai BJP sorkar hi sawiselin, Bihu festival chu sumdawnna atana hmangah a puh. Guwahati-a Bihu festival hmanna tur atan hian Assam sorkar chuan ticket a hralhchhuak a ni, a ti.

CM Himanta Biswa Sarma chuan kumina Bihu festival hi chhinchhiah reng tur a ni dawn tih sawiin, Guinness Book of World Records siam tumin Bihu dancer 11,000 chuangin lam an entir dawn a ni. Prime minister Narendra Modi pawhin he festival hi a hmanpui ang.

Bihu festival hi Guwahati-a Sarusajai Indoor Stadium-ah neih a ni dawn a, he huna tel tur hian state hrang hrang governor, chief minister, union minister, G20 palai leh ASEAN ramte sawm an ni.

Kumina festival hman tur hi ropui taka hman tumin, state sorkar chuan Delhi khawpui bakah, Kolkata leh Mumbai-ahte publicity campaign a nei. CM Sarma pawhin festival hmanna tur hmunah inbuatsaihnate pawh a enpui reng a, state mipui leh ram pumah hriatreng leh chhinchhiah tlaka buatsaih an tum a ni.

Bihu dance hmanga record siam tumin a sample video pawh Guinness World Records-ah an thawn tawh a, an lo pawmsak tawh a ni. An ruahman dan chuan dancer 11,000 velin Bihu dance hi minute 15 an lantir ang. He huna dancer tel turte hi an thawmhnaw man, Rs 10,500 ṭheuh pek an ni dawn a ni.