Bihar-ah Meghalaya kohhran hruaitute tihbuai an ni

Bihar, Patna-a Meghalaya Presbyterian Church hruaitute tihbuai an ni chu Meghalaya chief minister Conrad K Sangma chuan a dem thu a sawi.

Kohhran hruaitute hi April 11 khan Bihar-a an mission field-a thawk, missionary-te tlawh turin Alamgang area-ah an kal a, Bajrang Dal activist nia sawiten an lo tibuai a ni. Bajrang Dal lamin an lo tihbuaite hi Laitumkhrah Presbyterian Church pastor Reuben G Laloo leh Tymmenbasan T Nongkhaw-te an ni. Mipuiin an lo tibuai hnuah police station-ah hruai an ni tih report chuan a tarlang.

Meghalaya CM Sangma chuan Bihar-a kohhran hruaitute chunga thil thleng chu a dem thu a twitter-ah tarlangin, Meghalaya police-te chu Bihar police-te bepawp turin a hrilh nghal tih a sawi.

Patna SSP Rajeev Mishrsa chuan buaina chhuahna hmun hi police-ten thleng nghalin, kohhran hruaitute hnenah pawh anmahni tibuaitute chu hriattir tura an ngen thu a sawi. Mahse hruaitute hian FIR ziakluh kher loa an state lama kir leh an duh thu an lo hrilh a, an haw lamah pawh Patna Airport thlengin security pek zui an nih thu a sawi a ni.

Meghalaya Pradesh Mahila Congress chuan Bihar-a Bajrang Dal-te chet dan an dem thu an sawi a, thuchhuah siamin sakhaw inlehtir tih chhuanlama hmanga sakhaw tlem zawkte beih an ni fo tiin, an tum tak chu thu dik tawk lo hmanga Kristian leh sakhaw tenau dang zuitute tukzal a ni, an ti.

Khasi Jaintia Christian Leaders Forum pawhin Kristian worker-te beih an ni chu an dem thu sawiin, hemi rual hian state pahnihte'n hma an la nghal chu lawmawm an tih thu an sawi. Boruak ṭha lo zawk a chhuah lohna'n, social media lamah thu dik tawk lo thehdarh lo turin mipuite an ngen nghal bawk.