Assam sorkarin May thlaah ṭhalai 50,000 te hna pek a tum

Assam chief minister Himanta Biswa Sarma chuan May 11-a a kaihhruai sorkarin kum hnih a tlinna pualin, thla thar hian ṭhalai 50,000 chu sorkar hnaah lak thar an ni dawn tih a sawi.

CM Sarma chuan, "Union home minister Amit Shah-in hna pek tharte hnenah appointment letter hi a sem dawn a ni," a ti.

Kum 2021 assembly inthlan dawnah khan BJP an sorkar chuan kum khat chhungin sorkar hnaah mi nuai khat lak a tiam a ni. A thutiam hi a tihhlawhtlin loh avangin eptu party lamin beihnan an hmang zui nasa hle.

Sarma chuan kum hnih chhungin, sorkar hna thawk mi 50,000 dawn lak thar a ni tih a sawi a, mi nuai khat lak an lo tiamna chu thla tharah hian tihhlawhtlin a ni ang, a ti. Hemi an tihhlawhtlin theihna chhan chu centre leh state-a BJP an sorkar vang a ni, a ti. "Mipuite hnenah pawh state tinah hetiang hmasawnna a thlen theihna atan BJP tichak zel turin ka ngen a ni," tiin a sawi nghal bawk.

Chief Minister chuan kum 2024 Lok Sabha inthlan neih hmain BJP district office pasarih leh divisional office 200 pawh sak a ni dawn tih a sawi bawk a ni.