NESO-in AFPSA hlih a, Hmarchhak pumah ILP hman phut

Hmarchhaka zirlai pawl lian ber, North East Students’ Organisation (NESO) chuan hmarchhak bial pumah sipai hnena thuneihna sang pekna, Armed Forces Special Powers Act (AFSPA) chu hlih a, Inner Line Permit (ILP) system hman an phut tih an sawi.

NESO chairman Samuel B Jywra chuan Dimapur-a press conference a neihah, hmarchhak biala zirlaite chu ramchhung hmun dang aiin kawng tam takah hnufumna an la neih avangin, Common Univer­sity Entrance Test (CUET) pawh hmarchhak state-ah chuan kalpui hrih lo turin an phut tih a sawi bawk.

Samujjal Bhattacharya, NESO advisor chuan hmarchhak bialah technical leh non-technical institution tam zawk din turin thuneitute a phut a, dan loa Bangladesh aṭanga lutte pawh an ram lama thawn kir vek a phut bawk a ni.

Bhattacharya chuan, "NESO hian Citizenship Amendment Act (CAA) hman tumna chu a dodal tlat a ni," a ti.

Hmarchhak bial hmun eng emaw zatah sipai hnena thuneihna sang pekna, AFSPA hman a nih vangin he dan hmang hian mipuite chungah tawrhna pawh a thleng nasa tih sawiin, kum 2021, December 4 khan Nagaland-a Mon district-a Oting-ah sipaiten nitina inhlawhfa, civil mi 13 an kahhlum chungchang a sawilang bawk. "AFSPA vang hian kan tuar nasa tawh a, he dan hi hmarchhak bial aṭangin hlih a ni tawh tur a ni," tiin a sawi. NESO hian kum 2022, November 16-a general conference an neih ṭum khan AFPSA hlih phutna resolution an lo pass tawh a ni.

North East Students’ Organi­sation chuan leilung fate humhalh leh venhimna turin Inner Line Permit (ILP) system chu hmarchhak bial pumah hman an phut bawk. An thil phut chungchangah hian NESO office-bearers te chuan sorkar laipui aiawhte hmuh thuai an tum.