Assam : NRC coordinator hlui Hajela chhui a ni dawn

Assam-a National Register of Citizens (NRC) coordinator hlui, Prateek Hajela chu NRC update chungchang thil fel tawk lo leh, pawisa tam tak tih­chingpen nia sawi chung­changah chhui chian a ni dawn.

Chief minister Himan­ta Biswa Sarma chuan Prateek Hajela chhui chian a nih tur thu hi sawiin, state sorkar a case hi Director of Economic and Vigilance-ah a thlen tih a sawi.

Madhya Pradesh mi, Hajela hi 1995 batch IAS office, Assam-Meghlaya cadre niin, kum 2019 khan Supreme Court chuan Assam-a NRC update kalpui leh list tihchhuahna tur buaipui turin, NRC coordinator atan a ruat a ni.

Kum 2019, August thla khan NRC final list hi tihchhuah ani a, mahse diltu tam tak paih a nih vangin list tihchhuah hian sawisel a hlawh zui hle. NRC update danah thil fel tawk lo a awm nia puh chungchangah Hajela lakah hian thubuai eng emaw zat thehluh a ni. Supreme Court chuan Hajela nunna atan pawh a hlauhthawnawm nia sawiin, sorkar laipui leh Assam sorkar hnenah Madhya Pradesh-ah a rei thei ang ber dah turin a ti a ni. Hun rei tak a awm hnuin, Madhya Pradesh sorkar chuan thla hmasa khan Hajela hi AYUSH department-a principal secretary a chelh tir chu titawpin, a home cadre Assam-ah a hna zawm tawh turin a ti a ni. Mahse Hajela hian Assam-a kir leh ai chuan voluntary retirement scheme (VRS) hnuaiah a hna aṭanga chawlh hi a dil a ni.

CM Sarma chuan, Hajela chu Assam-ah kir leh mah se eng department nge an chantir ang tiin, a hming a chhe tawh a, chanvo pawimawh pek a nih chuan sorkar lam chuan dem a hlawh zawk dawn a ni, a ti. Sarma hian NRC state coordinator a nih laia a thil tih dik tawk lo haichhuaktu, Guwahati-base NGO Abhijeet Sharma, Assam Public Works (APW) chu lawmthu a hrilh bawk.