Manipur-a Kristian pawlin biak-in tihchhiat an dem

All Manipur Christian Organisation (AMCO) chuan Imphal-a biak-in pathum tihchhiat a ni chu an dem thu sawiin, he thil hian Kristiante rilru a ti na hle tih an sawi.

Manipur-a Kristian pawl lian ber, AMCO chuan sakhaw inzahdersakna pawh awm loin, April 11 zing kar hma takah Tribal Colony, Imphal-a biak-in pathum, Evangelical Baptist Convention Church (EBCC), Holy Spirit Catholic Church leh Manipur Evangelical Lutheran Church-te chu ṭhiahsak an ni, a ti.

AMCO joint secretary Rev L Manga chuan sorkar rama sak nia sawi, biak-in pathumte hi Aprill 11 zing dar 3 velah, biak-in compound chhunga chengte pawh an la mut laiin, an bungrua thiarchhuahna hun tur pawh pe mumal loin ṭhiah an ni tih a sawi. "He thil thleng hian min ṭhawng hlawm hle a ni. Sorkar thutlukna leh dante chu kan zah hle. Mahse biak-in ṭhiahsak an nih dan hi ngaihthiam har kan ti. Sorkar chuan hun a pe tam tawk lo, " tiin a sawi. Hei bakah hian sorkar chuan sakhaw hmun thianghlim a nihna pawh zah loin, Kristianten Pathian biakna atana an hman ṭhin chu bulldozer nen a nuai chhiat sak tih a sawi.

Supreme Court-in sorkar rama sakhaw hmun awmte sawnchhuah emaw, ṭhiahsak an nih dan tur chungchangah kaihhruaina a siam a, Supreme Court thupek angin kum 2010 khan vantlang hmuna phalna nei loa sakhaw hmun sak chungchangah Manipur Policy siam a ni. Kum 2011, October 11 khan state cabinet chuan district pangaah sakhaw hmun 188 sakte pawmsakna tur rawtna a siam a, hemi kum vek October 27-ah pawm a ni. Mahse cabinet-in a pawmsak zingah hian Kristian biak-in leh inkhawmna hmunte pakhatmah telh a ni ve lo a, hei hi inthliarna nasa tak a nih thu AMCO chuan a sawi bawk.