PM Modi-a'n Assam a tlawh, Rs vbc 14,300 hu project a hawng

Prime minister Narendra Modi chuan nimin khan lehlangin Assam a tlawh a, Rongali Bihu festival a hmanpui bakah, state chhungah hmasawnna hna thawhna tur Rs vbc 14,300 hu project a hawng.

Chawhma dar 11:30-ah PM Modi hian Guwahati thlengin, Kamrup (Rural) district-a Rs vbc 1,123 senga din, All India Institute of Medical Sciences, Guwahati a hawng a, virtual hmangin medical college pathum a hawng nghal bawk. AIIMS Guwahati dinna tur lungphum hi kum 2017, May thla khan Modi hian a lo phum tawh a ni.

Assam-a medical college pathum hawn tharah hian undergraduate department 24 awmin, kum khatah MBBS zirlai 100 an awm belh thei dawn a, Assam-a MBBS zirlai lak theih zat hi 1,500 a tling chho tawh dawn a ni.

Prime Minister hian cashless healthcare medical treatment, Rs nuai 5 chin hman theihna tur Ayushman card, mi vaibelchhe 1.1 hnena semchhuahna tur a hawng bawk. Assam sorkar leh IIT Guwahati thawkdunte'n Rs vbc 546 senga Assam Advanced Healthcare Innovation Institute (AAHII) an dinna tur lungphum a phum bawk.

Heng programme zawh hnuah, Modi hian Srimanta Sankardeva Kalakshetra panin, Gauhati High Court Platinum Jubilee kharna inkhawm a hmanpui.

Sarusajai Sports Complex-ah North East Frontier Railway project thar panga, Rs vbc 7,289 hu a hawng bawk a, virtual hmangin Namrup-a Assam Petro-Chemicals Limited methanol plant a hawng leh bawk. Brahmaputra lui chunga Palashbari-Sualkuchi Bridge Project, Rs vbc 3,200 senga siamna tur leh, Rang Ghar Complex-ah Rs vbc 124 senga siam, Asia rama Ahom era amphitheater upa ber cheiṭhatna tur lungphum a phum bawk a ni.

PM Modi hian a programme hnuhnung berah Ronglai Bihun festival hmanpui lehin, hemi hnu hian New Delhi lamah a kir leh nghal a ni.