Nagaland-a counter-insurgency operation-a tel sipaite an vaia khin dilna sorkar laipuiin remti lo

Sorkar laipui chuan kum 2021, December 4-a Nagaland-a counter-surgency operation neih ṭuma sipai tel, mi 30-te an vaia khin phalna an dil chu a remtihsak lo tih Nagaland police-te chuan an sawi.

Operation an neihnaah hian civil mi 14 kahhlum an ni a, he thil thleng vang hian tualchhung mite leh sipaite inkarah intihbuaina nasa tak a thlen zui phah a ni.

Nagaland-a Mon district-ah sipaite operation neih dan chungchang hi Nagaland Special Investigation Team (SIT) chuan chhuiin, chargesheet an thehluhah he operation neihnaa tel sipai 30-te hming pawh ziahlan a ni.

Nagaland police chuan thuchhuah siamin, "Department of military affairs, ministry of defence chuan sipaite an vaia khinna tura dilna siam chu a remtihsak lo," tiin hei hi court-ah pawh an hriattir tih an sawi.

Kum 2021, December 4 khan Mon district-a Tiru-Oting area-ah Indian Army-a 21 Para Special Forces sipaite chuan coal miner paruk an kaphlum a. Heng mite hi pickup-ah chuangin, sipaite chuan hel an rawn kal dawn tia thu an dawn chu an hriatsual vanga kap tiin an insawifiah a ni. He thil thleng vang hian tualchhung mi thinrim chuan sipai motor pahnih an hal a, sipaite nen intibuai zuiin, sipaite silai hmehpuahah tualchhung mi pasarih an thi leh a, security force mi pakhat a thi bawk. Buaina kal zelah he thil thleng tukah hian Mon khuaah sipaite silai hmehpuahah mi pakhat a thi leh bawk.

Nagaland sorkarin Mon district-a thil thleng chhui tura a din, SIT chuan May 30, 2022 khan court-ah chargesheet thehlutin, sipai 30-te hming hi tarlan a ni. SIT chuan miner-te hi thah ngei tuma kah an ni, tiin an tarlang.