Assam-ah Covid-19 Kai 135 awm tawh

Assam-ah Covid-19 kai hmuh belh zel an ni a, nimin thleng khan an state-ah he hri kai hmuh tawh hi mi 135 an awm tling tawh. Hri kai zinga 88 hi enkawl mek an ni. 

Assam health minister Himanta Biswa Sarma chuan Thawhṭanni khan hri kai mi 15 hmuh belh an ni tih a sawi hnuah, nimin khan hri kai dang hmuh belh zel an ni leh bawk. Thawhṭanni khan hri kai  zinga pakhat, cancer natna vei mek chu a thi a ni. 

Nimina hri kai hriat belh zinga pahnih chu Chennai leh Darjeeling aṭanga haw an ni tih minister chuan an sawi. 

State handloom, textiles and sericulture minister Ranjit Dutta chuan lockdown avanga ram chhung hmun danga tangkhangte an haw khawm mek a, an state tan hrileng do hna chu a inṭan tak tak tih a sawi. State pawn aṭanga hawte chu an vaiin uluk taka screening neihsak zel an ni dawn tih sawiin, hri darh zel tur venna kawngah sorkar leh thuneitute chauh ni lo, mitin ten theihtawp an chhuah a ngai a ni, a ti. 

Tripura-ah pawh Border Security Force (BSF) Ambassa unit-a 86th battation-a awm sample 457 test result aṭangin, sipai zingah pahnihin coronavirus hi an kai tih hriat belh a ni. Tripura-ah hian hri kai hi mi 169 an tling tawh a ni. 

Chief minister Biplab Kumar Deb chuan hri kaite hi uluk taka enkawl an ni tih sawiin, an zinga 85 chu enkawl dam an ni tawh a ni, a ti. 

Meghalaya-a Covid-19 kai enkawl lai awmchhun chu Thawhṭanni  zan khan a result a negative ta tih chief minister Conrad Sangma chuan a sawi. 

Sangma chuan  an state chu  hri lak aṭang hian a fihlim tih puan a ni thei ta tih a sawi. Health minister Al Hek chuan, "Nakin zelah engnge lo thleng tur chu kan sawi thei lo a, mahse tunah chuan kan state-ah chuan hri kai hi kan awm ta lo a ni," a ti.  Meghalaya-ah hian Covid-19 kai hi mi 13 hmuh an ni a, an zinga pakhatin a thihpui a ni. 

Manipur-ah Delhi aṭanga bus hmanga haw zinga mi pahnih, nufa chu Covid-19 an kai tih nimin khan hriat a ni leh. Heng mite nen hian Manipur-a hri kai hmuh zat hi pakua an tling tawh a ni. 

Hri kai nufa te hi Kamjong district-a Khongjai khuaa mi an ni a, May 16 khan Manipur an thleng. Covid care facility-ah dah luh nghal an ni. An hawna bus-a an chuanpui mi dang 20-te pawh enfiah nghal an ni ang.