Nagaland Congress-in tangkhangte hawna tur Rel ngaihtuah sak turin sorkar phût

Nagaland Pradesh Congress Committee (NPCC) chuan state sorkar hnenah, khawpui hrang hranga Naga tangkhang mekte hruai hawna tur special train ngaihtuah thuai turin a phût. 

NPCC chuan thuchhuah siamin, hmun danga tang­khang mekte hruai haw hna chu kar khat chhunga zo fel hman turin an phut thu an tarlang. Ni 55 chhung ram pumah lockdown kalpui a nih tawh avangin Nagaland aṭanga kal, hnathawk leh zirlaite dinhmun chu ngaih­tuahpui an ngai tawh hle tih an sawi. Hnathawktu tam takin hna an chan a, in luah mante an pek theih loh avangin hnawhchhuah tawkte pawh an awm a ni, a ti. 

"Hripui leng mek hian kan rin phak bakin chi inthliarna leh inhmuhsitna, inbeihnate a thlen belh a, rilṭamin tam tak an awm mek. Kan mi leh sa, hmun danga tangkhang zinga a tam zawk tan ni khat lek pawh a rei tawh a ni," tiin NPCC chuan a sawi. State hrang hranga Congress unit-te kaltlangin Naga mi tangkhangte chu theih ang anga an puih thu an sawi bawk.