Manipur CM-in nurse-te a ko haw lo tih a sawi

Manipur chief minister N Biren Singh chuan kar liam taa Kolkata-a private hospital hrang hranga thawk, Manipur nurse 185-te chu state sorkarin a ko haw lo tih a sawi. 

Kolkata private hospital hrang hranga thawk nurse 350 chuang chu kar liam ta khan bangin, an zingah hian Manipur aṭanga kal nurse 185 an tel a ni. Heng nurse-te hi Manipur-ah hian an haw tawh a ni. 

Nurse bangte hruai hawna tur hi state sorkara home department-in a buaipui nia sawi chungchang chu chhangin, CM chuan sorkarin nurse leh doctor-te pualin hetiang thil hi a buaipui lo tih a sawi. "An thawhna hmunah thawk chhunzawm zel turin kan tilui thei lo a, mahse Manipur-ah lo haw turin kan ngen lo. Mi tupawh, nurse leh doctor pawh ni se, rawn haw turin kan ti lo. Mahse an thawhna hmunah nuam an ti lo a, an thawk chhunzawm duh loh a nih erawh chuan an thu a ni. Hmun hrang hranga damlote enkawla hna thawka chhuakte kan chhuang hle a ni," a ti. 

Kolkalta private hospital ṭhenkhata thawk, nurse-te chuan an thawhna hmunah thawktute himna an ngaihtuah pui lo a,  personal protective equipment (PPE) te hman nawn tir zel an ni a, hei vang hian hri leng laka an him tawk lo nia an ngaih thu an sawi. Covid-19 kai enkawltu nurse-te awmna tur isolation unit hran siamsak an ni lo a, damlo enkawl zawha inbualna tur pawh an duh ang hman tur an nei lo niin an sawi. Hei vang hian an hna aṭang hian bangin, an state lam an pan hlawm a ni. Hetih lai hian Kolkata private hospital association chuan Manipur sorkarin nurse-te hi a ko haw niin an puh a, hei hi Singh chuan chhangin, an koh haw an nih loh thu a sawi. 

Private hospital-a thawk nurse bangte hi Manipur mi te bakah Tripura leh Odisha aṭanga kalte an ni.