AP: Governor-in Rhino motorcycle rally vailiam

Arunachal Pradesh governor KT Parnaik chuan Rhino motorcycle rally, Itanagar-Tezpur (Assam) leg chu Pathianni khan Itanagar-a Raj Bhavan aṭangin a vailiam.

He rally hi Indian Army 101 area headquarters-in martar leh veteran-te puala a buatsaih a ni.

Governor chuan, "Rhino motorcycle rally hian civil-military thawhdunna pawh a tinghet zual dawn a, hmarchhak biala ṭhalaite pawh armed forces zawm chakna rilru a puttir dawn a ni," a ti. Rally-a telte chuan an paltlang district thuneitute nen thawhhona ṭha tak nei a, mipuite hnenah ram hmangaihna thu pawh chah zel turin a fuih bawk.

Rhino motorcycle rally hi hmarchhak bial ṭhalaite nena inpawhna ṭha siam a, armed force zawm duhna rilru an put theihna atana 101 area headquarters-in a buatsaih a ni. Ni 15 awh tur niin, April 9 khan Shillong, Meghalaya aṭangin an tlan ṭan a, Meghalaya governor Phagy Chauhan-a'n Rhino Training Complex aṭangin a vailiam a ni. Hmarchhak state hrang hrang an tlawhkual hnuah April 23-ah Shillong-ah vek hian an kir leh dawn a ni.

Rally-ah hian motorcycle rider 10 telin, Col Pankaj Chaturvedi-a'n a ho a ni. Arunachal Pradesh, Assam, Meghalaya, Nagaland, Manipur leh Mizoram tlawhin, km 2,061-a thui an tlan ang.