Meghalaya : Garoland state phutin GSMC in rally huaihawt

Garoland State Movement Committee (GSMC) chuan Garoland state hran siam phutin kar liam ta Inrinni khan Williamnagar khuaah public rally an huaihawt.

Meeting hi Rongrenggre School playground-ah neiin, GSMC member-te bakah Garo National Council-a MDC awmchhun leh Deputy CEM, Nikman Marak-ten an telpui a ni. Nikman chuan Garoland state siam phutna resolution pawh nawr an tum tih sawiin, "Assembly session lo awm turah Garoland leh Khasiland state-a ṭhendarhna tur resolution hi kan phut dawn a ni. East Garo Hills-a NGO-te pawhin min thlawp a, kan thil phut hi tihhlawhtlin a nih hma chuan kan nawr zel dawn a ni," a ti.

GSMC hruaitu Balkarin Ch. Marak chuan Garoland state hran phutna hi hun rei tak aṭanga kalpui ni tawhin, GSMC hian kum 2012 aṭang khan he movement hi an kaihruai chho tih a sawi. Ṭhangthar zel tana Garo hnam nihna venhim a, kawng hrang hranga an dikna chanvo humhalhna tur leh, mipuite hmasawnna turin state hran a neih hi a ngai a ni, tiin a sawi. State hran an phut chungchangah Garo mipuite chuan lungrual taka an beihho a ṭul thu a sawi bawk.