Assam CM-in KNP-a sapel ṭhin venna atana hmalakna enfiah

Asasm chief minister Himanta Biswa Sarma chuan Pathianni khan Kaziranga National Park-a sapel ṭhin venna tura hmalakna enfiahin a tlawh.

CM hian Park chhung hi fangkualin, a bikin ven uluk ngai zual, Brahmaputra lui kamte a fangkual a, forest guard leh Park official-te a kawm bawk.

Assam sorkar hian KNP-a ramsa, a bikin a hmingthanna, samak ki khat neite humhalhna turin, sapel ṭhin titawp turin hma a la chho a, kum 2022 khan park chhunga samak ki khat awm zingah sapeltute kuta thi an awm lo. Hei hi kum 1977 hnuaa samak pel an awm loh ṭum khatna a ni. KNP hi khawvela samak ki khat nei hi a hlawma an awm tamna ber hmun niin, khawvel hmun hrang hrang aṭang pawhin tlawhtu an ṭhahnem thei hle.

Kaziranga National Park and Tiger Reserve humhalh hna thawktute thuam chak turin, Assam sorkar chuan forest battalion khat bakah forester eng emaw zat a lak belh dawn a, thawktute hi May 10-ah lak thar an ni dawn tih CM chuan a sawi.

Kum 2022-ah KNP-a sapeltute kuta samak thi an awm loh hnuah, kumin March thla khan samak pakhat chu sapeltute'n an kaphlum nia sawi a ni. CM pawhin samak kahhlumna hmun nia sawiah hian forest camp a awm lo niin a sawi. "A kaptu hi a tlanchhia a, samak ruang pakhat hmuh a ni. Mahse police-te chuan he samak thihna chhan sapeltute kahhlum a ni ngei em tih erawh an la nemnghet lo," a ti. Park chhung hmun ṭhenkhatah venhimna ṭha tawk lo laite a awm a, DGP nena an la tlawh leh dawn a, harsatna awmte pawh chinfel a ni thuai dawn a ni, a ti.

KNP-a sapeltu nia hriat SAudil Ilsam hi kar liamta Zirtawpni khan police-ten an man a, samak ruang awmna, Bagori rang an panpui laiin police-te kut aṭangin a tlanchhuak a, mahse a hnuah Brahmaputra luiah a ruang hi hmuh a ni.