Manipur BJP MLA ṭhenkhatin CM Singh ban turin phût

Manipur-a rorellai, BJP MLA ṭhenkhat chu New Delhi-ah inkhuar mekin, central lama an party hotute hnenah N Biren Singh chuan Manipur chief minister a nihna aṭanga ban turin an phût.

CM Singh laka lungawi loa New Delhi-a inkhuar mekte hi MLA 10-12 inkar nia sawi a ni a, an zinga a tam zawk chu Kuki hnam nia sawi an ni. Heng MLA-te lungawi lohna chhan pakhat chu kumin March thlaa CM Singh kaihhruai Manipur sorkarin kum 2008-a Kuki helpawlte nena inkahhai, SoO inremna an lo ziah tawh a tihtawp vang a ni.

Manipur sorkarin Kuki helpawl nena inkahhai puan a tihtawp hi Kuki area-a chengte nitin khawsak phung thlengin an nghawng niin mipuite chuan an MLA-te hnenah hian an hrilh a ni. MLA hel zinga pakhat chuan, "BJP hian Manipur leh hmarchhak state dangah prime minister Narendra Modi leh home minister Amit Shah-te vangin hma an sawn zel a, mahse Manipur-ah chuan state BJP leh state sorkar hruaitute avangin harsatna kan nei chho ta a ni. Manipur-a hruaitute hian democracy kalphung angin ro an rel lo a, mimal thuneihna ang mai a ni," tiin a sawi.

Thawhṭanni khan Langthabal assembly bialtu, BJP MLA Kawram Shyam chu Tourism Corporation chairman a nihna aṭangin a lo bang tawh bawk a ni. April 13 khan BJP MLA Thokchom Radhesyam Singh chu adviser to Chief Minister a nihna aṭangin a bang bawk.