Bihu world record siamna hmuna hla sak Naga citizen group-in an dem

All Assam Naga Welfare Society (AANWS) chuan tun hnaia Assam khawpui, Guwahati-a Guiness World Records siamna atan Bihu lam entir ṭuma an hla sak chu an dem thu an sawi.

Guwahati-a Sarusajai Stadium-ah hian April 13-ah Bihu dancer 11,304-ten Bihu lam an entir a, a ruala hmuna khata Bihu lam entirtu tam ber niin, Guiness World Record an siam a ni. He hun hi Assam cultural affairs department-in khawvel huapa Bihu hnam lam phochhuahna tura an buatsaih a ni.

AANWS chuan Bihu lam entirnaa artist Ranjit Gogoi-a hla sak, 'okora Nogake bhinihi buli matilu majoni oi' chu Naga hnam hmuhsitna a ni a, hei hian Naga mipuite rilru a ti na hle a ni, tiin Gogoi chu a hla sak avang hian ngaihdam dil tura an phut thu an sawi. AANWS bakah Naga civil society leh organisation, community-based council leh zirlaite pawhin he hla hi an lo sawisel tawh bawk a ni.