Manipur : School 38-ah sanitary pad vending machine dah dawn

Manipur sorkarin Chief Minister's Menstrual Hygience Scheme (CMMHS) a kalpuina hnuaiah, state chhunga school 38-ah sanitary pad vending machine dah a ni dawn a, hemi atan hian hma lak mek a ni.

Heng school 38 aṭanga zirtirtu 75-te tan nikum December 27 leh kumin January 6 inkar khan Imphal-ah orientation programme buatsaih a lo ni tawh a, sanitary napkin pekchhuahna tur pawh tihfel a ni tawh bawk. School 16-ah sanitary vending machine dahna tur hian buaipui mek an ni.

Chief minister Biren Singh chuan heng khawl hmang hian sanitary napkin-te awlsam zawkin an la thei dawn a, hei hian bio-medical waste titlemin, hmeichhiaten thi an neih laia infection awm thei tur pawh a tihziaawm phah thei dawn a ni, tiin a twitter-ah a tarlang.

CMMHS hi December 15, 2022 khan Health Department, State Health Society, National Health Mission, leh Education Department-te nena thawkhoin an hawng a, district tinah school naupang, hmeichhe tleirawlte chu menstrual hygiene chungchangte zirtir a, a thlawnin sanitary napkin hi an sem bawk.