Ranjit Gogoi-a'n Naga mipuite hnenah ngaihdam dil

Assam-in Bihu dance-a Guiness World Record a siam ṭuma chief choreographer, Bihu artist Ranjit Gogoi chuan Bihu lam entirnaa a hla sak chungchangah Naga mipuite hnenah ngaihdam a dil.

Gogoi chuan an hla sak chu Assamese culture pakhat niin, an inhlan chhawn zel a nih thu a sawi a, eng hnam emaw rilru tihnat tumna an nei lo tih a sawi. "Kan unau Naga ṭhenkhatin he hla thu ṭhenkhat chu an duh lo hle tih ka lo hria a, Naga mite rilru tihnat kan tum lo a, kan lo ti na a nih chuan ngaihdam ka dil a ni," a ti.

Bihu lam entirnaa a hla sak hi Assam-a Naga hnam chengte chuan sawiselin, a hla thu ṭhenkhat 'okora Naga, Nagini, etc." te chu Assam leh hmarchhak hmun danga cheng Naga hnam hmusitna a ni tiin an dem thu pawh an lo sawi tawh a ni. Okora tih hi mawl/chhaw tihna a ni a, Nagini tihah hian naga hmeichhiate chu rul nen tehkhin an ni bawk.

Naga Council chuan thuchhuah siamin, he hla satu Ranjit Gogoi chu Naga mipuite hnena ngaihdam dil tura an phut thu an lo sawi tawh a ni.

Eptu hruaituin ngaihdam dil turin CM Sarma a phût

Assam legislative assembly-a leader of opposition, Debabrata Saikia pawhin Thawhlehni khan Assam chief minister Himanta Biswa Sarma chu Ranjit Gogoi-a hla sakin Naga mipuite rilru a tihnat chungchangah, state sorkar aiawha Naga-te hnenah ngaihdam dil turin a phût.

Saikia hi Nazira assembly bial MLA a ni a, a bial chhungah hian Naga hnam, a bikin Sumis hnam tam tak an awm a ni. Assam-ah hian Naga hnam hrang hrang 10 hi mi nuai 2.5 vel an awm a ni.

CM Sarma hnenah lehkha thawnin, Saikia chuan, "April 13-a Guiness World Record siamnaa artist Ranjit Gogoi-a hla sakin Naga mipuite rilru a ti na hle tih ka lo hria a ni. He hla thu ṭhenkhat chu Naga hnam hmusitnaah Naga organisation/society hrang hrangin a ngai a ni. He hla hi Bihu hla hlui a ni maithei a, mahse tunlai khawvela hnam inhmuhsitna leh deusawhna lam hawi hi pawm theih a ni lo. A bikin khawvel pumin an lo en tura state sorkarin hun a buatsaiha sak chhuah a ni hi a dik lo a ni," a ti. Hei vang hian Assam Chief Minister a nih angin, he thil hi ngaihven rang a, boruak ṭha lo zawk thleng tur veng tura hma la thuai turin a ngen.