Tripura CM-in ruihhlo zuar leh ti ṭhinte police-te hrilh ṭhin turin ngen

Tripura chief minister Dr Manik Saha chuan state mipuite chuan ruihhlo do hna thawk ṭheuh tura ngenin, ruihhlo zuar leh ti ṭhinte chu police-te hnenah hriattir zel turin a ngen.

Chief Minister chuan police-te hnena hriattirtu nihna chu thup tlat a ni zel dawn tih sawiin, an himna chu state sorkar mawhphurhna a ni tih a sawi.

State sorkarin ruihhlo do hna a thawh meknaah, mipuite pawh theihtawp chhuahpui tura sawmin, Dr Saha chuan ruihhlo-a sumdawngte pholang zel turin mitinte a ngen a ni. "In vengte kha uluk takin thlithlai reng ula, in veng chhunga ruihhlo zuar leh a puitute chu zawngchhuak zel rawh u. Ruihhlo ti ṭhinte pawh hriat tumin, tute nge ruihhlo pe ṭhin tihte hriat tum rawh u. In thu hriatte chu thuneitute in rawn hrilh zel ang a, a hrilhtu chu thup tlat zel a ni ang," a ti.

CM chuan, "Hmelma lian tak hneh tur kan nei a, chu chu ruihhlo hi a ni. Sorkarin ruihhlo dona tur policy siam mah se, mipuite min thawhpui zel a ngai a ni. Ruihhlo avanga harsatna kan tawh mek hi a bulṭhut aṭanga nuaibo tur chuan mipuite lungrual taka kan do tlan a ngai a ni,"tiin a sawi.