Tripura-ah Covid hluarna state aṭanga lutte Covid-19 test neih ngai

Tripura sorkar chuan Covid-19 kaihhruaina thar siamin, Covid hri hluarna state aṭanga khualzin lut turte chu Covid-19 test vek turin a ti.

Covid-19 test nei tura tihte chu Kerala, Delhi, Maharashtra, Karnataka, Gujarat, Himachal Pradesh leh Tamil Nadu state aṭanga kalte an ni. Airport, rel station leh Churaibari check gate-ah test hi neihsak an ni zel dawn tih health official chuan a sawi.

Hospital-ah face mask hman vek tur tih a ni bawk a, public place hrang hrangah screening neih a ni bawk ang.

Tripura-ah hian April 14 aṭang khan Covid-19 hri kai thar hi mi 10 an awm tawh a ni. State sorkar chuan hri darh zel tur venna atan five-fold strategy - test, tract, treat, vaccinate leh Covid appropriate behaviour chu a kalpui zel dawn tih official chuan a sawi bawk.

Health and family welfare department chuan mipuite tana thurawn tichhuakin, punkhawm tamna hmunte pumpelh tur leh, boruak luh ṭhat lohna hmunahte awm lo turin a chah.

Ram chhung hmun dangah Covid-19 hri a hluar chhoh leh hnuah hmarchhak state-te chu hun eng emaw chen an fihlim a, mahse kar liam ta aṭang khan hmarchhak bialah pawh hri kai thar hmuhchhuah hi an awm chho ve leh a ni.