Chinese language training buatsaihna turin Indian Army leh Tezpur University-in MoU ziak

Indian Army leh Tezpur University chuan April 19 khan sipaite hnena Chinese ṭawng, Mandarin zirtirna, training programme siamna turin memorandum of understanding (MoU) an ziak.

Chinese language training programme hi kar 16 chhung Tezpur University-ah buatsaih a ni ang. MoU hi Indian Army aiawhin HQ4 Corps leh Tezpur University aiawhin registrar-ten an ziak a, vice chancellor Prof SN Singh-an a telpui a ni.

Lt. Col. Mahender Rawat, PRO-Defence (Guwahati) chuan sipaiten Mandarin an thiam chuan, Chinese sipaite nena an indawrna kawngah pawh a pui dawn hle, a bikin commander level talk, flag meeting, joint exercise leh border personnel meeting neihah Chinese Peoples’ Liberation Army (PLA) nena an indawrna kawngah a ṭangkai dawn a ni, a ti.

Kum 1994-a din, Tezpur University hi central university a ni a, foreign language zirna awmin, heng zingah hian Mandarin pawh a tel a, zirtirtu pawh an nei ṭha hle.