ST list-a Meetei/Meitei telh rawtna thehlut turin Manipur sorkar hriattir

Manipur high court chuan Manipur sorkar hnenah scheduled tribes (ST) list-a Meitei/Meetei hnam telhna tura rawtna chu union ministry of tribal affairs-a thehlut turin Nilaini khan a hriattir.

High Court chuan he rawtna hi hriattir an nih aṭanga kar li chhunga thehlut turin a hrilh bawk a ni.

Manipur-a civil society organisation hrang hrang chuan hun rei tak aṭangin ST list-a Meitei/Meetei hnam telh hi an lo phut tawh a, hetih lai hian tribal pawl, a bikin zirlai pawlte chuan an dodal thung.

April 17 khan Scheduled Tribe Demand Committee of Manipur (STDCM) chuan Outer Manipur MP Lorho S Pfoze hnenah ST list-a Meitei/Meetei phutin, memorandum an lo thehlut tawh a ni. STDCM chuan, "Meitei hnam hi Manipur leilung fa an ni a, ST list-a tel tura ngai ang pawh an nei ve vek a ni. Minority-a awm tur venna leh, anmahni ram ngeia refugee ang maia an awm tur venna atan, ST list-ah hian telh ve ngei a ni tur a ni," tiin an sawi.