Hmarchhak bialah food street 11 siam tum

Union health ministry leh union ministry of housing and urban affairs thawkdun chuan ram chhunga state leh Union Territory-a district 100-ah food street 100 siam turin an ngen.

Food street siamna tur an rawt zingah hian hmarchhak bial chhungah 11 a tel a, Assam-ah pali niin state dang- Arunachal Pradesh, Manipur, Meghalaya, Mizoram, Nagaland, Tripura leh Sikkim-ah pakhat ṭheuh siam tum a ni.

Sorkar laipui chuan ei tur him leh thianghlim siamna kawnga hmalakna atan, pilot project-ah ram chhung hmun hrang hrangah food street siam hi a tum a ni. He project hmang hian khawtlang mipuite chu ei tur him/thianghlim leh hriselte ei tura infuih a, ei tur hrisel tawk lo ei vanga natna hrang awm ṭhinte tihtlem leh, mitinte hriselna ṭha zawk an neih theihna turin hma an la ang.

Union health secretary Rajesh Bhushan leh housing and urban affairs ministry secretary Manoj Joshi-te chuan state hrang hrang hnenah lehkha thawnin, "Mipuite hriselna atan ei tur him leh thianghlim awlsam zawka an neih theihna ngaihtuah sak chu thil pawimawh tak a ni. Ei tur ṭha/him ei ṭhin hi invawn thianghlimna lam thlengin a pui dawn a, tualchhunga ei tur lama sumdawngte, tualchhunga eizawnna leh tourism lam thlengin a pui dawn a, hei hian economy-ah pawh nghawng a nei dawn a ni. Environment thianghlim leh fai neihna kawngah min hruai bawk ang," tiin an sawi.

Street food hi ram chhung hmun tinah an siam uar hle a, man tlawm zawka zawrh an nih avangin dawrtu pawh an tam ṭhinin mi tam takin eizawnna atan an hmang mek a ni. Hemi rual hian eisiamte hi a him leh thianghlim tawk em tih erawh enfiahna mumal tak tak a awm lo hle thung. Guwahati-a zirchianna an lo neihah, street food vendor-te chu ei tur hrisel leh thianghlim taka siam kawng leh, an ei tur zawrhna hmun vawng thianghlim kawngah zirtirna mumal tak pek a ṭul hle tih pawh an lo sawi tawh a ni.

State leh UT tinte street food siamna atan hian Rs vbc 1 zel pek an ni dawn a, heng sumte hi National Health Mission (NHM) hnuaiah 60:40 emaw 90:10 emawin pek an ni ang.